زجل عن الشعب المصري

لقيت الفانوس مرة ودعكته -- طلعلى عفريت قاللى شبيك لبيك

قلت خلاص الذل أنا ودعته -- ويا عفريت بالطلبات هاهريك


قالى هأوأو يا إنسان -- دانا العفريت بن الجان


ما يهمنيش مكان وزمان -- واطلب وعندى البرهان


قلتله عاوز قمح زُرع فى مصر -- ومسؤولين يبطلوا فشر


وحكومة متعصرنيش عصر -- ومرتب يسترنى لآخر الشهر


وعاوز عيش بدون طوابير -- وحكومة ضد التبذير


وانتخابات من غير تزوير -- ورئيس سابق أشوفه كتير


وعاوز في بيتي كيلو دقيق -- وسبب مقنع لأي حريق


ومجلس شعب بدون تصفيق -- وفى كأس العالم لينا فريق


وعاوز أزور شرم الشيخ -- وصباعين كفتة اللى فى السيخ

وأشرب مرة عصير بطيخ -- وأخرج من القسم بدون تلطيخ


ونفسي الضحكة ترجع تانى -- وحتة لحمة كندوز أو ضانى

وجنيه مصري زى البرانى -- ورصيف للمشي أنا وخلاني

رد العفريت عليا بغشم -- وقال يا مصري ماكنش العشم

بص.. أنا ممكن أنقلك الهرم -- وأسدلك الأوزون اللى اتخرم

وأرجعك الأكل اللي أتهضم -- وأعملك بقرة من الغنم

وأعملك قصر من العدم -- وأقولك معنى شرم برم

بس طلباتك طلبات ملموس -- عقله خلاص أكله السوس

ده تخطيط يا بنى ومدروس -- إنك تعيش على طول موكوس

وأحنا بناخد منكوا دروس -- إزاى نخلى العفريت متعوس

ويا رب ترجعنى تانى الفانوس -- وزى بعضه أعيش محبوس

بدل ما أخرج واتبهدل زيك -- وأعيش موكوس على متعوس