ايه رأيكم في اللي حصل امبارح من جمهور الزمالك

طبعا اللي حصل امبارح دا شئ مقزز واستحاله ان الناس دول يكونوا بيحبوا مصر
ايه ياجماعه دا
الجمهور كله نزل الملعب وكأن في حرب اهليه
ليه يشمتوا فينا العالم ؟ وليه يخلوا اللي يسوي واللي ما يسواش يتكلم عننا
طبعا انا برسل هذا اكلام لاخواني الزملكاويه( وعلي فكرة انا اهلويه) يرضيكوا اللي حصل دا ؟

أفتكر يا أستاذة ان البلد فيها حاجات اهم من اننا نتناقش فيها أحسن واهم من الكورة أنا كنت زملكاوى جدا لكن بعد الثورة انا قررت انى ابطل تشجيع كورة طبعا اللى حصل انا مشفتوش بس طبعا شىء مؤسف للغاية لكن الله اعلم مين اللى عمل كده لكن مهما حصل مش هيجى حاجة جنب بطش وظلم النظام السابق اللى لسه بيتنعم بالفلوس اللى نهبها
اتمنى كلنا نسيبنا من الكورة شوية الكورة اللى كل هدف الحكومات منها انهم يشغلوا الشعوب عن امور السياسة فى بلادهم ونركز فى الأهم اننا نبنى بلدنا ونعليها ومنضيعش دم الشهداء ومنسيبش اللى سرق فلوس الشعب يتنعم بيها وندافع عن الثورة بكل قوتنا بدلا من ان تموت فى مهدها

انا اختلف معك يا استاذ محمود
اولا لان الرياضه شئ مهم جدا شئ بيجمعنا وشئ احنا محتاجينه
كمان الدنيا مش كلها سياسه وبس لا
في الدين في الرياضه في الثقافه في التعليم
ولو كلام حضرتك معناه ان احنا نسبنا من اي حاجه تانيه ممكن ترفهه عننا شويه ونقعد نبكي علي الي راح ونقعد نقول ان احنا اتسرقنا من اكتر ناس كنا بنحترمهم يبقي عمرنا ما هنتقدم وهنفضل كده مستنين حد يجي بيفهم اكتر مننا ويعرف يكلفتنا بكلمتين ويضحك علينا ويسرقنا عيني عينك
كمان اللي حصل في الماتش حاجه مسيئه لمصر كلها سواء كنت بتتفرج علي كورة والا لا
وكمان لو اني ماكنتش اتفرجت علي الماتش ماكنتش هعرف ادافع عن الثورة قدام اي حد بيحاول يدخل اللي حصل فيها
وكمان في ناس بتحاول انها تنسب اللي حصل للنظام السابق
ولو اني ماكنتش شفت الماتش كنت هبقي قاعده مش فاهممه اي حاجه
وكان ممكن اصدق اي حاجه بتتقال
ومع احترامي لكلامك احب اقولك ان الانسان المنعزل عن الرياضه والثقافه مش هيقدر يطلع في شهر سبتمر علشان يختار الريس اللي ممكن يكون كان لعيب كورة
صح؟ والا انا غلطانه

لاء انتى مش غلطانة فى حاجة يا استاذة لكن احب اعرفك ان اللى عايز ينعزل عن الكورة فى سبتمبر القادم هيعرف يختار كويس .
ولا يمكن انتى شايفة ان الكورة بتساعد الناس على انها تختار مين الأنسب ليها انا طبعا بدين اللى حصل فى الماتش لكن الله اعلم مين اللى عمل ده وبرضه النظام السابق مفيش حاجة بعيدة عليه يعنى .
وعموما انا بس كنت حابب اقول ان البلد بتمر بأزمة يبقى لازم نقف جنبها ونشتغل ونبنى بلدنا وبلدنا مش هتتبنى بالكورة اللى هيا اساسا مش رياضة دى عبارة عن قمار وكان غرض الحكومة منها الهاء الشعب عن التحدث فى الأمور السياسية .
وفيه حاجة أخيرة اتمنى محدش يفهم كلامى غلط .